Nadiskobre dagiti otoridad ti agarup 100,000 fully grown marijuana plants nga addaan iti estimated street value a ₱20,000,000.00 kabayatan iti dua nga aldaw nga eradication operation dagitoy manipud Hulyo 11 agingga Hulyo 12 idiay Mount Makago-ong, Barangay Saclit, Sadanga, Mountain Province.
Ti nasao nga operasyon ken naipatungpal babaen iti nagtipon a pwersa dagiti nagduduma nga anti-illegal drug operatives pakairamanan ti Philippine Drug Enforcement Agency (PDEA) – Mountain Province Provincial Office, Mountain Province Police Provincial Office (MPPPO) – Provincial Drug Enforcement Unit, Sadanga Municipal Police Station, Provincial Intelligence Unit – MPPPO, ken ti 2nd Provincial Mobile Force Company (PMFC).
Nakamula dagiti nasao a marijuana plants iti agarup 10,000-square-meter a kalawa a nasarakan iti borders ti Sadanga, Mountain Province, ken Tinglayan, Kalinga.
Awan met ti naarestarda a suspek iti nasao nga operasyon. Nupay kasta, impetteng dagiti otoridad a mannarimaan ti imbestigasyonda tapno mabigbig dagiti landowners ken maamwan dagiti cultivators a responsable iti illegal plantation.
Kagiddan dayta, nagballaag ti kapulisan ken PDEA kadagiti komunidad nga agbalinda a naridam ken ireportda a dagus kadakuada nu adda dagiti mapagduaduaan nga agricultural wenno illegal drug-related activities. //bombokarensapirao via Bombo Alfred Pudsoc
