Nagballaag manen ni Mayor Benjamin Magalong ti publiko a nainget a maipawil iti siudad ti operasion dagiti permanente a cement batching plant ken temporario nga street mixing sites gapu iti saan a nasayaat nga epekto dagiti aglawlaw.
Ti panangipawil ket nadatag iti Ordinance Number 43, Series of 2007 wenno ti Anti-Batching Plant Ordinance, kasta metten ti Ordinance Number 2, Series 2012, inamyendaran iti Ordinance Number 4, Series of 2015.
Ti siasinoman nga aglabsing ket mabalin a mamulta iti P5,000 ken maipaserra ti operasionda.
Ginuyugoy ni Mayor Magalong ti publiko nga ireport iti City Permits and Licensing Office (CPLO) ti aniaman nga iligal a batching plant wenno job mix activities tapno dagos a maaksyunan.
Sigun iti myor, dagiti batching plant ket pagtataudan iti polusion iti angin, danum ken kinalaaw a mabalin a makadadael iti salun-at dagiti residente ken dagiti sumarsarungkar iti siudad.
Maipalagip nga impaserra iti lokal a gobierno ti maysa a dakkel a batching plant idiay Camp 7 iti tulong iti City Mayor’s Office, City Environment and Parks Management Office (CEPMO), ken dadduma pay a task force.
Naipatungpal ti panangipawil kadagiti cement batching plant idi 2007 kas addang tapno maaywanan ti aglawlaw iti Baguio kontra iti polusyon gapu iti produksion iti semento.
