Nagsinnungbat iti social media da Senator Robin Padilla ken Philippine Coast Guard (PCG) spokesperson for the West Philippines Sea Rear Admiral Jay Tarriela idi Biernes, Hulyo 17, 2026.
Daytoy ket kasaruno ti AI-generated video nga inruar ti state-backed media a China Daily no sadino, inladawanda ti Pilipino kas bakes.
Immuna a kinarit ni Tarriela da Padilla ken Senador Alan Peter Cayetano a kiddawenda iti China a mangipaay daytoy iti public apology kadagiti Pilipino a kas iti inaramidda idi kenkuana.
Maipalagip a kinondinar ken in-demand da Padilla ken Cayetano kenni Tarriela nga agkiddaw iti dispensar iti China gapu iti panagaramatna idi iti caricature ni Chinese President Xi Jinping.
Iti social media post, sinungbatan ni Padilla no sadino, pinabasolna ni Tarriela a daytoy ti nangirugi iti maatap a gulo ken ti panaggaramidna idi iti wartime propaganda kontra iti China.
Sinungbatan met daytoy ni Tarriela babaen iti social media no sadino, kinunana a saan a wartime propaganda ti transparency initiative nga inaramidda no di ket maysa a wagas tapno ibutaktak ti agresyon ken panang-harass ti China kadagiti mangngalap a Pilipino, barko ti Philippine Coast Guard ken Bureau of Fisheries and Aquatic Resources (BFAR).
Sigun pay kenni Tarriela, ti panangawatna ni Padilla iti kapanunotan ti China a bakes dagiti Pilipino ket insulto iti nasurok 26 million a Pilipino a nangibutos iti senador.
Maipalagip a kinuna ni Padilla iti social media postna nga iti mata dagiti dagiti puraw a mananakop, ket bakes dagiti Asyano.
Kamaudiananna, impaganetget ni Tarriela a ti pudno a panagraem iti puli tayo a Pilipino ket ti panangidepensa iti pagilian ken saan a panangawat kadagiti insulto.
