Impila ti Office of the Ombudsman ti criminal charges kontra kenni USWAG Ilonggo party-list Rep. James Ang Jr. ken sigud a Sultan Kudarat representative Arnulfo Go gapu iti maatap a conflict of interest seknan iti government infrastructure projects.
Opisial a naproseso ken in-raffle ti Sandiganbayan ti kaso a graft ken malversation kontra kada Ang ken Go ken sumagmamano nga indibidual.
Sumangsango ni Ang iti 14 a kaso a panaglabsing iti Section 3(h) ti Anti-Graft and Corrupt Practices Act nga addaan iti conflict of interest.
Pinasingkedan ti ombudsman a karaman ni Ang kadagiti mammanday-linteg a naipasidong iti umuna nga imbestigasion gapu iti maatap a pakainaiganna kadagiti construction firms a nakagun-od iti kontrata ti gobierno.
Kabayatanna, naipila ti uppat a Criminal case kontra kenni Go iti Sandigan Bayan.
Maibasar iti rekord ti korte, sumangsango da Go ken dagiti tallo a sigud a lokal nga opisial manipud iti munisipyo ti Lebak, Sultan Kudarat iti dua a kaso a graft gapu iti maipagarup a panaglabsingda iti Section 3(e) ti Republic Act 3019, agraman ti dua a kaso a malversation of public funds iti sidong ti Article 217 ti Revised Penal Code.
Karaman kadagiti naidurum ni sigud a municipal mayor ti Lebak a ni Dionesio Besana, municipal accountant Allan Bayani ken municipal treasurer a ni Mario Labrador.
