Kasaruno iti panawagan ni President Ferdinand R. Marcos Jr. iti State of the Nation Address (SONA) a pababaen ti gastos iti kuryente dagiti Pilipino, dagos a nangipila ni Benguet Rep. Eric Go Yap iti dua a singasing a linteg iti Kamara de Representantes iti uneg laeng iti 24 nga oras.
Panggep dagitoy nga ikkaten ti sumagmamano a buis nga impataw iti binnulan a mabayadan iti kuryente.
Sigun kenni Yap, ti panawagan iti Presidente ket saan laeng a maipapan iti panangibaba iti singir iti kuryente nu diket maysa a gundaway tapno sikimaten nu patas paylaeng ti agdama a sistema.
Kinunana a saan a rumbeng nga ipasa kadagiti konsumer dagiti gastos a saanda met a responsable.
Ti dua a singasing, a naipila idi Hulio 28, ket maitunos iti panawagan ni Marcos nga amyendaran ti Electric Power Industry Reform Act of 2001 (EPIRA) ken ipawil ti panangipasa kadagiti konsumer dagiti saan nga nainkalintegan a singir, karaman ti system loss charges ken dadduma pay a buis.
Iti sidong iti House Bill No. 10328, insingasing ni Yap nga ikkaten ti 12% a Value-Added Tax (VAT) iti system loss charge para kadagiti residential consumer.
Nabilin metlaeng iti singasing ti Energy Regulatory Commission (ERC) a siguraduen a maimatangan ti VAT exemption iti binnulan a bill.
Kabayatanna, iti House Bill No. 10327, insingasingna met nga iparit nga ikkaten ti otoridad ti Batas Pambansa Blg. 36 a mangipatpataw iti energy tax iti konsumo iti kuryente.
Sigun kenni Yap, saanen a maus-usar daytoy a linteg ken nayon a pakadagsenan dagiti pamilia a sumangsango iti nangato a gastos.
Impaganetget metlaeng ni Yap a karaman ti Pilipinas nga addaan iti kangatwan a singir iti kuryente iti Southeast Asia gapu iti nagduduma a pass-through charges ken buis.
Impettengna a ti panagkessay kadagitoy ket makatulong tapno adu a kita ti mailatang kadagiti pamilia iti taraon, edukasion, ken salun-at da.
Ti panangipila kadagiti singasing ket kasaruno iti statement ni President Marcos iti SONA daytoy a rumbeng a repasuen ti EPIRA ken isardeng ti panangipasa iti system loss charges kadagiti konsumer.
