Suportado iti Benguet Electric Cooperative (Beneco) ti singasing ni President Ferdinand Marcos Jr nga ikkaten ti systems loss charge iti singir iti kuryente, ngem impaganetgetna a kasapulan paylaeng ti panagadal a nasayaat tapno saan a maapektaran ti operasyon kadagiti electric cooperative.
Sigun kenni Benguet Electric Cooperative General Manager Melchor Licoben, saan a kas kadagiti pribado a distribution utility, non-profit dagiti electric cooperative ken ti masingsingir laeng kadagiti konsyumer ket umdas para iti operasyon ken maintenance dagitoy.
Impettengna a ti panagikkat iti system loss charge ket mabalin a mangitunda iti kinakurang iti pondo ken makaapektar iti operasyon kadagiti kooperatiba.
Kinuna metlaeng ni Licoben a dakdakkel ti epekto iti panagbaba iti singir iti kuryente iti panangkessay iti generation charges, a mangbukbukel iti 55 agingga iti 60% iti pakabuklan nga electricity rate.
Nakasagana metlaeng ti nasao a kooperatiba a makipaset kadagiti saritaan tapno makabukel iti singasing nga agpada a mapagnumaran dagiti konsyumer ken distribution utilities.
