Agtultuloy ti nainget iti City Health Services Office (CHSO) ti kampania daytoy kontra iti HIV/AIDS ken dadduma pay a sexually transmitted diseases (STDs) bayat nga agtultuloy a ngumatngato dagiti nairekord a kaso iti siudad ti Baguio.
Sigun kenni CHSO Medical Officer IV Dr. Clement Bilalat, napateg ti agtultuloy a panangipaay iti edukasion ken impormasion iti publiko tapno maliklikan ti panagwaras dagiti sakit.
Kinunana a makatulong dagiti awareness campaign, lectures, ken social media iti panangiwaras iti pannakaamo seknan iti proteksion ken dagiti serbisio a mabalin nga asitgan dagiti apektado nga indibidual.
Kinuna ni Bilalat a kaaduan kadagiti nairekord a kaso ket agtawen iti 15 agingga 34 nu sadinno ad-adda nga aktibo dagiti tattao iti pannakirelasion ken nalawlawa ti panagaramat iti moderno a wagas iti panagsapul iti kainayan-ayat.
Kaaduan metlaeng kadagiti kaso ket manipod iti lallaki, a mangbukbukel iti 94% iti nailista a kaso.
Agtultuloy met a mangipapaay ti CHSO iti libre nga screening, konsultasion, panangagas, ken edukasion dagiti pasiente.
Nangilatang metlaeng ti ahensia iti preventive services a kas iti condom, Pre-exposure Prophylaxis (PrEP), ken lubricants.
Ginuyugoy iti CHSO ti publiko nga agpakonsulta a dagos ken saan nga urayen a lumabes ti sintomas, gaputa adda dagiti serbisio a nakasagana a tumulong iti panangliklik ken panagkontrol iti HIV/AIDS ken dadduma pay nga STDs.
