ABRA – Agsagsaganan dagiti ahensia iti lokal a gobierno ken dagiti partner institution iti Abra para iti World Café of Opportunities (WCO) 2026 a maisayangkat inton Agosto 25, kas paset iti panagregget a mapalawa ti akses iti trabaho ken pagbiagan.
Indauloan iti TESDA-Abra ti maysa nga inter-agency planning meeting kadua ti nagduduma nga ahensia iti gobierno ken organisasion tapno pagsaritaan ti koordinasion dagiti programa a maidiadiaya iti publiko.
Karaman kadagiti serbisio a maiyasideg kadagiti umili ti job opportunities, technical-vocational training, entrepreneurship support, ken dadduma pay a frontline government services.
Natalantan metlaeng dagiti promotional activities a kas iti radio guestings ken Kapihan media forum tapno maguyugoy dagiti ad-adu a jobseekers ken dadduma pay a benepisiario.
Sigun kenni TESDA-Abra TESD Specialist Emilyn Sencio, napateg ti agtultuloy a suporta dagiti partner agencies iti naballigi a panangisayangkat iti WCO ken iti panangpalawa iti oportunidad iti trabaho para kadagiti Abreño.
