Agtaltalinaed ti bileg iti pammilin iti Commission on Audit (COA) iti Office of the Vice President (OVP) nga isubli ti P73 milion a confidential funds a nairuar idi 2022, malaksid nu mangiruar iti temporary restraining order (TRO) ti Korte Suprema.
Sigun iti sigud nga state auditor a ni Atty. Roderick Wamil, nangiruar ti COA iti notice of disallowance gaputa saan nga umdas ti naisubmitir a dokumento iti OVP tapno mapaneknekan nu kasano a nabusbos ti pondo.
Iti impeachment trial ni Vice President Sara Duterte, inlawlawag ni Wamil nga uray agapela ti OVP iti Korte Suprema, kasapulan latta nga isublina ti gatad bayat nga awan pay ti pammilin a mangpasardeng iti daytoy.
Inlawlawag met ni Senate impeachment court presiding officer Francis “Chiz” Escudero a ti desision iti COA ket maibilang a pinal bayat nga awan pay ti nairuar a TRO ti SC.
Impaganetget met ni Senator-judge Imee Marcos a mabalin paylaeng nga iyapela ti notice of disallowance.
Innayon ni Wamil nga adda ti presumption iti sidong iti Joint Circular No. 2015-01 a mabalin a maaramat iti personal ti pondo nu saan daytoy a naliquidate a nasayaat.
Nupay kasta, inlawlawagna a saan a direkta a nakadatag iti dokumento a naala wenno natakaw ti pondo para iti personal a panagaramat.
