Agtultuloy ti panagmonitor dagiti opisyales iti Atok, Benguet kadagiti lugar a mabalin a maapektaran gapu iti agtultuloy a panagtudo kadagiti napalabas nga aldaw.
Iti pannakiuman ti Bombo Radyo kenni Atok, Benguet Mayor Franklin Smith, imbinglayna nga idi Sabado, Agosto 1, nakurukor ti daga iti sirok ti kalsada iti KM 24 gapo iti napigsa a panagbayakabak iti tudo.
Dagos met a nagresponde dagiti personnel ti Municipal Disaster Risk Reduction and Management Office ken Department of Public Works and Highways tapno maikkan iti dagus nga aksyon ti insidente.
Iti agdama, one-way passable laeng ti nasao a kalsada kas paset ti panangsalaknib iti kinatalged ti publiko.
Kinuna ti mayor nga uray no mababantayan dagiti lugar a naibaga a landslide-prone, adda latta dagiti saan a mapakpakadaanan a pasamak.
Innayonna pay nga adda met dagiti naireport a bassit a landslide iti dadduma pay a paset ti munisipyo, ngem dagitoy ket dagus a naaksyunan dagiti otoridad.
Kabayatanna, nakarekep dagiti tourism sites iti Atok kagiddan iti panagbalakadna nga agannad gapu iti saan a napintas a panawen.
Iti sabali a bangir, manamnama nga adda dagiti mannalon a maapektaran no agtultuloy ti panagtudo isut gapuna a nakasagana dagiti Barangay Agriculture Extension Workers tapno agmonitor ken mangted iti dagus a tulong kadagiti maapektaran a mannalon.
Imbilin met ti Mayor iti publiko nga agtultuloy nga obserbaran dagiti safety measures ken agannad a nalaing, nangruna kadagiti motorista nga agdaldalyasat kadagiti landslide prone areas. | via Bombo Khey Reparip
