PROVINCE OF BENGUET – Maur-uray paylaeng a pirmaan ti Sangguniang Panlalawigan ti pannakaideklara ti State of calamity iti probinsiya ti Benguet kalpasan nga inrekomendar ti Provincial Disaster Risk Reduction and Management Council (PDRRMC).
Sigun kenni Governor Melchor Diclas, adu paylaeng ti isolated a paset ti probisiya gapu iti naglabas a bagyo ken agtultuloy nga epekto ti Habagat a nangitunda iti ipupusay ti lima nga indibidual.
Malaksid iti dayta, adu dagiti nailista a panagregaay nga agkasapulan iti dakkel a pondo para iti pannakatarimaan dagitoy.
Innayon ni Gov. Diclas nga agarup lima a provincial road ti makitkita dagitoy a kasapulan a matarimaan.
Iti agdama, bambantayan dagiti maseknan nga otoridad ti Km. 24 a paset ti Halsema Road gaputa addaan daytoy iti posibilidad a margaay.
Kabayatanna, agtultuloy ti clearing operations iti nargaay a paset ti Gov. Bado Dangwa National Road sadiay Bangho, Daclan, Tublay, Benguet.
Iti sabali a bangir, impeksa ni Gov. Diclas nga addan ti tulong a naipaay kadagiti pamilya ken apektado iti bagyo ken Habagat iti probinsiya.
Maipapaay metlaeng ti tulong kadagiti estudiante a na-stranded.
Agyamyaman ni Diclas iti napartak a koordinasyon ken garaw ti Department of Social Welfare and Development (DSWD) seknan iti pannakaipaay ti tulong kadagiti residente iti probinsiya ti Benguet.// via Bombo Noveh Organo
