Personal a nagturong ni Senator Robin Padilla kadagiti lugar iti probinsya ti Benguet a naapektaran iti naglabas a bagyo ken habagat.
Nagturong daytoy idiay Shilan, La Trinidad tapno personal a mangi-awat iti financial assistance para kadagiti pamilya a naawanan iti ay-ayatenda iti biyag.
Nagturong met daytoy idiay Atok tapno kitaenna ti sitwasyon iti napasamak a panagregaay ti daga sadiay.
Malaksid iti dayta, nagturong metlaeng daytoy idiay Kapangan tapno ipakita ti suportana ken pannakipagriknana kadagiti biktima iti naglabas a bagyo ken habagat.
Kinadwaan daytoy dagiti barangay ken municipal officials nga idadauloan ni Mayor Harris Dizon pakairamanan dagiti kapulisan.
Kabayatan iti panagbisita daytoy, nangisayangkatda iti site inspection kadagiti imprastraktura a nadadael.
Karaman kadagiti binisita dagitoy ket ti naapektaran iti landslide idiay Sacburoy Road ken ti sinking road idiay Junction Central.
Binalakadan met ti senador ni Mayor Dizon nga mangaramid dagitoy iti formal resolution para iti komprehensibo a rehabilitasyon ti nadadael a kalsada.
Impetteng ni Senator Padilla a babaen iti nasao a resolusyon, adadda a mafacilitate ti opisina na ti panangi-allocate iti pundo para iti pannakatarimaan ti Junction Central ken Sacburoy Road.
Inyebkas met ti komunidad ti Kapangan ti panagyamanda iti panagbisita ti senador ken ti tulong nga ipaay daytoy kadakuada.
Immuna metten a bimmisita ti senador iti siudad ti Baguio tapno personal a makipagrikna kadagiti pamilya dagiti pimmusay iti panagregaay ti daga idiay Guisad Surong. //kcs//
