Agpegpeggad iti panagreggaay ti daga ken layus dagiti agarup 8,436 a barangay iti pagilian gapu iti agtultuloy nga apekto ti Habagat a mangituntunda iti panagtudtudo.
Ngimmato ti nasao a bilang manipud iti nasurok 3,600 nga immuna a datos.
Sigun iti Department of Environment and Natural Resources – Mines and Geo-Sciences Bureau (DENR-MGB), naibasar daytoy iti 72-hour rainfall forecast ti state weather bureau ken ti epekto ti saan a nasayaat a sasaaden ti panawen kadagiti flood prone ken landslide prone areas.
Maibasar iti datos, agpegpeggad iti panagregaay ti daga ken layus ti 2,835 a barangay iti Region 1; 606 a barangay iti Region 2; 624 iti rehion Cordillera; 1,252 a barangay iti National Capital Region;1,969 a barangay iti Region 3; 765 a barangay iti Region 4A; 157 iti Region 4B; 224 a barangay iti Region 5; Region 6 a maysa a barangay ken ti Region 13 a tallo a barangay.
Kabayatanna, maibalbalakad kadagiti residente iti flood ken landslide prone areas nga agtalinaed nga alerto iti panagngato ken panagbaba ti layus.
Bantayan dagiti lugar nga asideg iti karayan, dirraas ken dagiti drainage canals.
Mapalpalagapin metlaeng ti publiko nga ipakaammo a dagus kadagiti otoridad ti anyaman nga indikasyon ti panagreggaay, dagus a panagngato ti libel ti danum ken ti napuskor a pitak nga intunda ti layus.
