Kinumpirmar ti National Disaster Risk Reduction and Management Council (NDRRMC) a dumanunen iti 29 nga indibidual ti pimmusay gapu iti naglabas a bagyo ken habagat iti pagilian.
Karaman iti nasao a bilang dagiti nakoriente, nalmes iti layus, nagaburan iti nargaay a daga, natupakan iti kayo ken dadduma pay.
Malaksid kadagiti pimmusay, agtultuloy paylaeng a mabirbiruk ti tallo nga indibidual a mapukpukaw.
Mainaig iti dayta, dumanon iti 19 dagiti kompirmado a nadangran.
Iti agdama, dumanonen iti 6.5 million a tattao dagiti apektado manipud kadagiti 11 a rehiyon.
Kabayatanna, agarup P4.66 billion metlaeng ti nadadael iti sektor ti imprastraktura, bayat a dumanon iti agarup P1.42 billion ti nadadael iti agrikultura.
Agtultuloy paylaeng ti panangiwanawan ken panagsukimat dagiti maseknan nga ahensiya kadagiti nadadael iti nasao a sektor.
