Pimmusay ti maysa nga estudyante a babae nga agtawen iti 16, residente idiay Kennon Road, Camp 1, Tuba, Benguet kalpasan a maatap a nalmes daytoy idiay Buo River, Camp 3, Tuba, Benguet itay nabiit.
Maibasar iti report ti kapulisan, kadua ti biktima ti lima a pada na metlaeng a menor-de-edad a nagturong iti nasao a lugar tapnu agpicnic.
Bayat iti panagkakadua dagitoy, maatap nga inyebkas ti biktima dagiti personal a problema daytoy.
Sumagmamano a minutos wenno oras ti napalabas, ginuyugoydan ti biktima nga agawiden.
Nupay kasta, saaen a nakaawid ti biktima a sibibiyag.
Inkagumaan met ti maysa kadagiti kakadua ti biktima nga irescue ti biktima ngem saanen a narekober daytoy gapu iti kondisyon ti karayan.
Apaman a nairepot ti insidente dagos a naipatungpal ti search and rescue operation babaen iti Tuba Municipal Police Station, Tuba Bureau of Fire Protection, ken Tuba Municipal Disaster Risk Reduction and Management Office ken volunteers manipud iti Camp 3, Tuba, Benguet.
Kabayatanna, pasado alas-otso ti Agosto 20 idi narekober ti bagi ti biktima idiay Ampasit, River, Camp 3, Tuba, Benguet.
Naideklara met a pimmusay ti biktima gapu iti nasagrap daytoy a traumatic rain injury ken skull fracture secondary to fall.
Saan metten a naipasidung iti autopsy ti bagi ti biktima gapu ta mamati dagiti pamilya ti biktima nga awan ti foul play.
Kabayatanna, imparikkep metten dagiti barangay officials ti nakapasamakan ti insidente. // Bombo Noveh Organo
