Nagtitipon ti agarup 300 nga indibidual pakairamanan dagiti post-war veterans, annak ken kapamilya dagiti suldado a paset iti 66th Infantry Regiment, government officials, ken dadduma pay a bisita idiay Provincial Capitol idi napalabas a lawas para iti 81st Liberation Day ken pananglagip iti kinabanuar dagiti suldado a nagbalin a paset iti pannakagun-od iti waya-waya ti pagilian kabayatan iti World War II.
Indauloan daytoy ni Benguet Governor Melchor Diclas kaduana dagiti dadduma pay a provincial officials.
Iti mensahena, inyebkas ni Gov. Diclas ti panagyamanna kadagiti beterano ken pamilyada gapu iti impakitada a sakripisyo kabayatan iti gubat.
Impettengna a dagiti impakita dagiti beterano a sakripisyo ken panagayat iti pagilian ket agserserbi kas ligasiya para kadagiti sumarsaruno a henerasyon.
Kabayatanna, iti met mensahe ni Veterans Federation of the Philippines-Cordillera Administrative Region Regional President Veteran Darlito P. Dumlao, babaen kenni Veteran Edmundo S. Belly, impettengna ti kinapateg iti panangipreserba iti istorya dagiti beterano a suldado tapno maawatan dagiti sumarsaruno a henerasyon ti kabaelan ti maysa a suldado nga aramiden para iti ayatna iti pagilian.
Maipalagip a naideklara iti pannakawaya-waya ti probinsya ti Benguet iti Agosto 15, 1945 kasaruno iti panangiwaragawag ni Japanese Emperor Hirohito iti pannakaisardeng ti kinaranggas dagiti Imperial Japanese forces.
