Temporario a naluktan iti amin a kita iti lugan ti Gov. Bado Dangwa National Road idiay Bangho, Daclan, Tublay, Benguet sipud idi Agosto 20 kalpasan ti clearing operations iti lugar.
Sigun iti abiso ni Tublay Mayor Juan Esnara, maysa a lugan laeng ti mabalin a dumalan iti naapektaran kas paset iti panagannad.
Mapatgan ti panagdalyasat manipod alas-5 iti agsapa agingga iti alas-8 iti malem, malaksid kadagiti emergency.
Mabalin met nga otomatiko nga iserra ti kalsada nu agtultuloy ti napigsa a panagtudona wenno saan a natalged ti kasasaad.
Mapalpalagipan dagiti motorista nga agannad, agtulnog iti traffic personnel, liklikan nga ag-overtake ken urayen ti signal sakbay nga agdalyasat.
Ti traffic management ket maisayangkat iti Tublay Municipal Police Station ken Bureau of Fire Protection, kadua ti Daclan Barangay LGU ken Tublay LGU personnel.
Naiserra ti kalsada kalpasan a nargaay ti slope protection structure gapu iti nalawa a panagregaay iti daga idi Agosto 13, gapu iti agtultuloy a panagtudona manipod kadagiti naglabas a bagyo ken habagat.
Nupay kasta, saan a direkta a bimmaba ti kalsada ti debris gaputa nasippaw daytoy iti rock net a nagserbi a salaknib iti nasao a paset iti national road.
