Kinuwestionaran ni Senate President Pro Tempore Vicente “Tito” Sotto III nu saan a manglabsing iti karbengan dagiti botante nga agpili iti lokal a liderda iti kanito a maitantan manen ti Barangay ken Sangguniang Kabataan Elections (BSKE) ita a tawen.
Dinakamatna daytoy kabayatan iti interpellationna seknan iti gakat ni Senator Francis “Chiz” Escudero nga aramiden a lima a tawen ti termino dagiti barangay ken SK officials manipud iti agdama nga uppat a tawen. Malaksid iti dayta, maisingsingasing metlaeng a maiyakar ti BSKE inton Nobyembre 2028.
Sigun kenni Sotto, naibotos iti 2023 dagiti agdama nga opisyales ken idi 2025 kuma a naaddaan iti eleksyon ngem naitantan manen daytoy.
Sigun iti senador, nu maiyakar manen ti eleksyon inton 2028, dumanonen iti tallo a tawen ti holdover period dagiti incumbent officials.
Inyunay unay metlaeng ni Sotto dagiti kaso a sangsangwen ti sumagmamano a barangay officials, rason tapno makwestionaran ti accountability iti lokal a gobyerno.
Dinakamatna nga adda ngamin dagiti reklamo a naipila kontra iti sumagmamano nga opisyal, pakairamanan iti kaso a nairamanan ti 12 barangay officials idiay Iloilo seknan iti maatap a panangkissay iti ayuda dagiti AICS beneficiaries.
Impetteng ni Senator Sotto a napateg a maikan iti gundaway dagiti botante tapno agpili kadagiti lokal a liderda.
Iti baet dayta, inlawlawag ni Senator Escudeo a ti gakat ket saan a tapno itantan ti eleksyon ngem panggepna laeng a mangituding iti lima a tawen a termino para kadagiti barangay ken SK officials.
Sigun kenkuana, panggep ti gakat a maaddaan iti nalawag ken permanente nga election cycle ken umdas a panawen tapno maipatungpal dagiti programa iti barangay.
