Agtaltalinaed a nakaalerto ti Department of Social Welfare and Development (DSWD-CAR) uray nu simmayaat ti paniempo.
Sigun iti nasao nga ahensya, aktibo pay laeng ti disaster response team dagitoy a mangipapaay kadagiti kaskenan a tulong kadagiti naapektaran a pamilya iti rehiyon. Mannarimaan metlaeng ti monitoring dagitoy iti kondisyon dagiti nagduduma a komunidad iti rehiyon tapno dagos a maipaay dagiti tulong kadagiti saan pay laeng a naikan a pamilya nga apektado.
Tapno masuportaran dagiti mannalon, nangipaay ti nasao nga ahensya iti agarup 156 Family Food Packs kadagiti mannalon idiay Beckel, La Trinidad, Benguet.
Kabayatanna, iti kaudian a datos ti nasao nga ahensya, agarup P81.012 Milyon a gatad ti humanitarian assistance ti naipaay dagitoy kadagiti apektado a pamilya iti agarup maysa bulan a panagduprak ti habagat ken bagyo.
Iti agdama, adda paylaeng ti 27 a pamilya nga adda iti uneg iti agarup pito nga evacuation centers iti rehiyon.
Sigun pay iti datos dagitoy, dumanon iti agarup 274,200 nga indibidual iti rehiyon ti apektado gapu iti habagat ken bagyo.
Nakasagana met ti nasao nga ahensya a mangipaay iti assistance kadagiti apektado nga indibidual a saan pay laeng a naipaayan iti tulong.
Agreportda laeng kadagiti bukod da a babbarangay para iti validation ken tapno maamuwan dagiti mayannatup a tulong a maipaay kadakuada.
