Pinasingkedan ti pagilian a Pilipinas ti komitment na iti panagsalaknib iti maritime rights, kas iti West Philippine Sea (WPS) bayat iti panaglukat ti Maritime and Archipelagic Nation Awareness Month (Mana Mo).
Sigun kenni National Maritime Council Undersecretary Alexander Lopez, agtultuloy latta dagiti naikalintegan nga aktibidad idiay WPS, pakairamanan ti resupply missions dagiti military outpost iti BRP Sierra Madre idiay Ayungin Shoal.
Innayonna pay nga agtalinaed da iti beddeng kas maitunos iti international law ken maipatungpal dagiti nagduduma nga aktibidad babaen iti natalna ken non-provocative a pamay-an.
Agtultuloy met ti panangiwaragawag ti pagilian a Pilipinas iti 2016 Arbitral Ruling gapu paylaeng iti agtultuloy a tension ken komprontasion iti nagbaetan ti Pilipinas ken China idiay West Philippine Sea.
Maipalagip a sigun iti Presidential Proclamation No. 316 a napirmaan idi tawen 2017, naideklara ti bulan ti Setiembre kas Maritime and Archipelagic Nation Awareness Month.
Panggep ti month-long observance ti panangisaknap iti publiko iti maritime and archipelagic issues and policies, kasta met ti kinapateg iti panangsalaknib iti aglawlaw ti baybay ti pagilian babaen kadagiti aktibidad nga idauluan dagiti ahensia ti gobierno ken dagiti local government units.//BomboKhey
