Kiniddaw dagiti opisial ti Barangay Ambuklao babaen iti Barangay Resolution a maaddaan iti Tax Holiday iti Agno River, Sitio Bangao, Barangay Ambuklao, Bokod, Benguet.
Sigun kenni Barangay Kapitan Reynaldo Tello iti Barangay Ambuklao, Bokod, Benguet, immunan a pinanggepda a mailukat para iti libre a quarrying ti nasao a karayan. Nupay kasta, gaputa adda ti linteg a mangregulate uiti daytoy ket nasaken pay nga agkiddaw dagitoy iti provincial office.
Inlawlawag iti kapitan a babaen iti daytoy ket makatulong iti dredging iti nasao a karayan kalpasan nga immadu ti siltation iti lugar.
Manarimaan metten ti panagtinnulong dagiti opisial iti barangay ken dagiti umili iti pannakaibangon iti gabion wires kas temporaryo a flood control tapno malapdan ti panaglupyas ti danum manipod iti Agno River a mangapektar kadagiti umili.
Sigun iti kapitan, agarup 400 a metro ti kaatidog ti manamnama a makabilan ti gabion wires.
Timmulong metlaeng iti proyekto ti munisipyu para iti pannakaipaay iti pondo.
Kabayatanna, inlawlawag ni Tello a ti agdama a flood control ket naibangon pay idi naudi a paset iti tawen 1997 nu sadinno nakatulong daytoy. Nupay kasta, gapu iti nagsasaruno a bagyo ken epekto iti Habagat ket kellaat nga immadu ti siltation a nangitunda iti panaglupyas ti karayan iti agdama a flood control nga isut parikut a sangsangwen ti nasao a barangay.
Imbinglayna pay nga idi ubing ti opisial, open field a talon ti nasao a karayan ngem gapu kadagiti naglabas a didigra ket naawanen dagiti taltalon.
Impeksana pay a nasurok 3 a metro a sigud ti agdama a flood control ngem gapu iti kinaadu iti siltation ket nasurok 1 foot laengen ti nabatbati.
Inlawlawag pay iti opisial a ti panagadu iti siltation ket gapu iti kinaadu iti bantay a narba iti ngato a paset ti barangay. Maysa a contributory factor pay ket ti farming activities nga agar-aramat iti heavy equipments ken dam.
Sigun kenkuana, insakripisio pay dagiti umili iti nasao a barangay ti ancestral lands ken kagawaan dagitoy para iti maysa a proyekto a pagnumaran ti adu a Pilipino. Nupay kasta, agingga ita ket maapapektaran latta ti panaglayos ti sumagmamano a pamilia gapu iti panaglupyas ti karayan.
Iti sabali a bangir, iti pangiturong ti kapitan kadagiti kameng iti media idiay Sitio Tikop ken Sitio Taki, Barangay Karao, Bokod tapno personnal a maimatangan ti kasasaad iti lugar gapu iti panagreggay iti bantay, impeksana a maysa daytoy a rason nu apay a naurnong dagiti sediments iti Ambuklao nangruna nu agtudo.
Impettengna met nga agtultuloy ti koordinasionda kadagiti dadduma nga opisial iti barangay, nangruna iti panangipalagip kadagiti umili ti panangmula iti kayo, nasayaat a farming activities ken dadduma pay.
Maipalagip nga idi Agosto 25, naawat ti Office of the President ti apela dagitoy para iti dagos a dredging iti Upper Agno River ken construction ti flood control projects iti nasao a lugar.
Nakiddaw pay ti comprehensive technical assessment iti nasao a karayan ken upstream areas idiay Ambuclao ken Binga Reservoirs; dagos a dredging, desilting, ken pannakapasayaat iti pagnaan iti karayan kadagiti high-risk areas; kasta metlaeng ti konstruksion wenno pannakapapintas ti flood-control structures tapno masalakniban dagiti agpegpeggad a komunidad.
Malaksid iti dayta, mangipaay pay iti pondo manipod iti national government ken makikoordinarda iti DPWH, DENR, National Power Corp., local government units, ken dadduma pay a maseknan nga ahensia para iti nasaysayaat a panagtignay.
Ti Barangay Ambuklao ket addaan iti 7,531.6 nga ektaria ken dumanon iti agarup 3,988 ti populasyon ken 908 ti sangkabalayan nu sadinno maysa kadagiti pagtataudan ti pagbiagan dagitoy ket ti agrikultura ken ti kangrunaan a produkto dagitoy ket ti tilapia. | via Bombo Noveh Organo
