Naduktalan ti National Bureau of Investigation (NBI) dagiti kanayonan a detalye iti imbestigasion dagitoy iti kontrobersial a 2019 Southeast Asian Games (SEA Games) cauldron, pakairamanan ti mapagduaduaan a reimbursement mainaig iti Philippine Olympic Committee (POC) ken ti Philippine Southeast Asian Games Organizing Committee (PHISGOC).
Sigun kenni NBI Director Melvin Matibag, malaksid iti maatap a double payment, nakaawat metlaeng ti PHISGOC iti reimbursement manipud iti POC.
Innayon ni Matibag a makukwestiyonaran ti nasao a transaksyon agsipudta nagtaud iti public funds ti kuarta nga imbayad ti POC.
Natakuatan metlaeng ti NBI a ti paset ti naaramat a cauldron para iti pannakapataud ti flame ket naabangan imbes a nagatang.
Im-imbestigaran ti NBI ti mapapati nga anomalous procurement dagiti proyekto a mainaig iti 2019 SEA Games kalpasan a nakaawatda kadagiti baro nga impormasyon ken dokumento a pakairamanan ti PHISGOC.
