Kinidaw ni Engineer Alexander Dapiawen, Councilor ti Mankayan, Benguet iti panagrespeto manipud iti dua a benneg seknan iti issue ti panagmina iti nasao a lugar partikular idiay Barangay Guinaoang ken Bulalacao.
Iti pannakiuman ti Bombo Radyo kenni Councilor Dapiawen, ti takder ti munisipyo ita ket ti panangkidaw iti respeto manipud iti dua a benneg kabayatan iti panangidepensada kadagiti bennegda.
Kasaruno daytoy iti impaulog ti korte a desisyon a mangipawpawil iti panagbarikada dagiti umili iti nasao a lugar. Inlawlawag ni Councilor Dapiawen a sigun iti nasao a desisyon, ibagbagada a nagtungpal iti umno a proseso ti Crescent Mining Company.
Nupay kasta, ti met depensa dagiti agbarbarikada, saan a nagdalan iti umno a proseso ti nasao a mining company no sadino maatap nga awan ti naipatungpal a Free, Prior, and Informed Consent (FPIC) kadagiti residente sadiay, rason tapno agtuloy ti panagbarikadada iti laksid ti impaulog ti korte a desisyon.
Impetteng ti nasao nga opisyal a kinidawda metten ti panagrerenespeto iti tunggal maysa ngem kinuna nga iti met kuma benneg ti Crescent ket saanda kuma nga ipilit nga umuneg iti nasao a lugar.
Imbinglayna pay nga iti baet nga naiparang ti desisyon ti korte a mangipawpawil iti panagbarikada, saan latta nga intulok dagiti umuli sadiay nga ipauneg dagiti equipment ti nasao a kompanya.
Iti baet dayta, inlawlawag ni Councilor Dapiawen nga iti kanito a mapalubosan ti Crescent Mining nga agoperate iti nasao a lugar, kasapulan nga agtulnogda kadagiti linteg ti munisipyo ken dumalanda iti ipaulog dagitoy a proseso no sadino maysa kadagiti requirementda ket kasapulan nga adda ti pammalubos ti komunidad nga agoperate da iti maysa a pasdek.
Nu maipapan met kadagiti napalpalabas a kaso, nasolbar metten dagitoy.
Imbinglay met ni Councilor Dapiawen nga iti agdama, ti sitwasyon iti nasao a lugar ket bambamtayan ti dua a benneg dagiti kasapulanda a bantayan. Saan latta a maiyuneg ti Crescent mining dagiti kagawaanda gapu iti kaadda dagiti barikada iti nasao a lugar.
Inulit met a kinidaw ni Councilor Dapiawen a pagtalinaeden latta kuma ti panagrinaem iti tunggal maysa kabayatan iti panangilabanda iti bukodda a benneg. //kcs//
