Marigatan ti pagilian a makagun-od iti impormasyon seknan iti asylum cases ni sigud a Congressman Zaldy Co ken sigud a presidential spokesperson Harry Roque gapu iti nainget a privacy rules sadiay Europa.
Sigun kenni DFA Secretary Ma. Theresa Lazaro, nainget ti privacy rules iti European Union a pakairaman ti France.
Gapu iti dayta, awan ti magun-od dagitoy nga impormasyon.
Agaplikar metlaeng daytoy iti isyu ni Roque mainaig iti panagaplikarna iti asylum sadiay Austria a kameng ti European Union.
Impetteng ni Lazaro nga awan paylaeng ti kompirmasyon no nailaksid ti asylum application ni Roque.
Sumangsango ni Co iti kaso a graft, plunder, ken malversation gapu iti maatap nga iregularidad kadagiti flood control projects, bayat a sumangsango ni Roque iti qualified human trafficking charges a nainaig iti Lucky South 99 POGO hub sadiay Porac, Pampanga.
