Impaganetget ni Senator Francis “Kiko” Pangilinan a kasapulan nga agbalin a transparent ti Department of Agrarian Reform wenno DAR iti panangbigbig ket panangipaay kadagiti benepisyaryo nangruna ta binilyon ti pondo a kidkiddawen ti ahensya para iti tawen 2027.
Iti panagdengngeg iti Senate Committe on Finance iti singasing a national budget ti DAR, imbinglay ni Sen. Pangilinan a masapol a nalaka a ma-verify iti publiko dagiti benepisyaryo, proyekto, pasilidad, ken negosio a supsuportaran iti ahensya.
Iti singasing a 2027 budget, agkidkidaw ti DAR iti P14.69 bilyon no sadino 13% a nabababa no idilig iti alokasyon daytoy iti 2026 national budget.
Iti nasao a pondo, ₱5.9 bilyon ket para iti Agrarian Reform Beneficiary Development and Sustainability Program, karaman iti P949 milyon para iti climate-resilient farm productivity support.
Kwinestionaran pay ni Pangilinan no umdas ti pondo ken kiddawna a nasayaat nga agbalin a nalawag no anya ti aktwal a maipaay iti programa kadagiti agrarian reform beneficiary.
Maipalagip nga idurduron iti senador ti public transparency portal para kadagiti ahensya mainaig iti agrikultura iti napalabas a national budget. Iti sidong daytoy, nasken nga agbalin nga accessible iti publiko ti geotagged project information, government contracts ken procurement documents, resulta iti independent quality testing ken dadduma a datos maipapan iti implementasyon kadagiti proyekto.//via Bombo Khey Reparip
