Dead on the Spot ti drayber ti SUV bayat a nadangran ti pasahero daytoy kalpasan a natnag ti lugan idiay Sitio Urica, Ampucao, Itogon, Benguet itay agsapa, Setyembre 25.
Ti pimmusay a drayber ket agtawen iti 29, naasawaan, bayat a ti nadunor a pasahero daytoy ket agtawen iti 39, naasawaan; agpada a minero ken residente ti Sitio Santa Fe, Ampucao, Itogon, Benguet.
Maibasar iti report ti Itogon Municipal Police Station, nakaawatda iti awag manipud iti maysa a barangay tanod maipapan iti vehicular traffic incident.
Iti imbestigasyon, nakilamay dagiti biktima iti kabagyanda idiay Sitio Shoot, Brgy. Ampucao, Itogon, Benguet. Bayat iti panagdalyasatda iti Baguio–Philex Road paawid idiay Santa Fe, Ampucao, Itogon. Naawanan iti kontrol ti lugan, rason a natnag iti 80 metro ti kaunegna a rangkis.
Maibasar met iti interview dagiti otoridad iti nakalasat a pasahero, namiscalculate ti drayber ti one way passable road sharp curve, agingga nagdiretso ti lugan iti rangkis.
Gapu iti insidente, nagsagrap ti pasahero iti multiple physical injuries ken dagos a naitaray iti pagagasan bayat a ti driver ket naala nga awananen iti biag iti nakatnagan ti nasao a lugan.
Naiyawid metten ti bangkay daytoy iti pagtaenganda. //kcs//
