BAGUIO CITY — Mahigpit na ipinagbabawal ang basta-bastang pagdura sa mga kalsada, sidewalk, pader, parke at iba pang pampublikong lugar sa lungsod ng Baguio.
Ayon sa City Environment and Parks Management Office (CEPMO), hindi lamang hindi kanais-nais tingnan ang pagdura sa pampublikong lugar, maaari rin itong maging sanhi ng hindi malinis na kapaligiran at panganib sa kalusugan.
Nakasaad din sa City Ordinance No. 35, Series of 2020 ang pagbabawal sa pagnguya at/o pagdura ng moma o betel quid sa mga pampublikong lugar, kabilang ang maling pagtatapon ng laway o mga pinaglagyan nito. May kaukulang parusa ang mga lalabag:
Unang paglabag: ₱500 na multa o 4 na oras na community service
Ikalawang paglabag: ₱1,000 na multa o 6 na oras na community service
Ikatlo at mga susunod na paglabag: ₱2,000 na multa o 8 oras na community service, bukod sa iba pang parusang pinahihintulutan ng ordinansa
Paalala ng CEPMO sa mga nginunguya ng moma: gumamit ng tamang lalagyan at itapon ito nang maayos. Huwag dumura sa kalsada, sidewalk, pader o kanal.
Nanawagan din ang tanggapan sa publiko na panatilihing malinis ang mga lansangan, parke, sidewalk at iba pang pampublikong lugar bilang paggalang sa lungsod at sa mga taong naglilinis at nag-aalaga sa mga ito.
