Impeksa ni Financial forensic analyst Atty. Alexander Cabrera a saan daytoy a mabuteng.
Daytoy ket iti tengnga ti panangibasa ti depensa iti probisyon a mang-amamyendar iti Anti-Money Laundering Act partikular iti pannusa ti breach of confidentiality.
“I’m not scared naman po.”, sungbat ni Cabrera.
Sigun ngamin iti Section 9 (d) ti Republic Act 9194, ti pannusa para iti nasao a kaso ket pannakaibalud iti tallo agingga 8 tawen ken multa a saan a bumaba iti P500,00 ngem saan a sumurok iti P1 Million .
Iti kaso ti breach of confidentialty, ti agbalin a responsable ket dagiti reporter, writer, president, publisher, manager, ken editor-in-chief.
Mainaig iti dayta, dinamag ti depensa ti witness nu saan daytoy a madanagan a mabalin a manglabsing iti linteg ti panangipaay kenkuana ti prosekusyon kadagiti dokumento ti Anti-Money Laundering Council (AMLC), nga awan iti pammalubos ti senate impeachment court.
Inkalintegan met ni Cabrera nga impagarupna a mabalinna nga awaten dagiti dokumento gapu ta dinmalan metten daytoy iti Kamara.
Ni Cabrera ti maudi a testigo ti prosekusyon para iti nasao nga impeachment trial.
