Nadiskobre dagiti otoridad ti agarup 900 a puon iti fully grown marijuana plants (FGMJP) nga addaan iti mapatta-patta nga Standard Drug Price (SDP) a PhP180,000.00 iti dua a plantasyon idiay Agay-ay ken Illengan, Kayapa, Bakun, Benguet idi Oktobre 10 ken Oktobre 11.
Idiay Sitio Agay-an, agarup 400 a puon ti fully grown marijuana plants nga aggatad iti PhP80,000.00 ti dinadael dagiti otoridad idi Oktobre 10.
Kabayatanna, idi met Oktobre 11, nadiskobre dagiti otoridad ti agarup 500 a puon ti fully grown marijuana plants nga agatad iti agarup PhP100,000.00 idiay Sitio Illengan.
Apaman a nadokumentaran dagiti marijuana plants, dagos dagitoy a pinarut ken pinuoran dagitoy dagiti otoridad.
Naipatungpal ti operasyon iti sidung ti “OPLAN ULTIMATE GRASS CUTTER” ti Benguet Police Provincial Office (PPO) .
Indauloan daytoy ti Bakun MPS babaen iti panangsuporta ti 1st Provincial Mobile Force Company (PMFC), Provincial Drug Enforcement Unit (PDEU), Provincial Intelligence Unit (PIU) of Benguet PPO, Regional Intelligence Division (RID), Regional Intelligence Unit 14 (RIU 14), ken ti Philippine Drug Enforcement Agency–Cordillera Administrative Region (PDEA-CAR).
