Mannarimaanen ti panagsagana ni Carl Jammes Martin, Undefeated Filipino Boxer para iti sumaruno a laban daytoy inton Oktobre 31 idiay Saudia Arabia.
Iti pannakiuman ti Bombo Radyo Baguio kenkuana, imbinglayna nga adda ita daytoyen idiay Los Angeles para iti panagsanayna para iti nasao a laban.
Makalaban daytoy ti 33-anyos a Mexican contender a ni Alan David Picasso.
Imbinglay ni Martin a sumaysayaat metten ti kondisyon na babaen iti tulong dagiti coaches na ken adadalenda metlaengen ti kaudian a laban ni Picasso.
Innawagan met ni Martin ti nasao a laban kas arapaap ken “big break” iti boxing career na.
Innaklon na metlaeng ni Martin nga impetteng dagiti coaches na kenkuana a nadagsen a kalaban ni Picasso gapu iti tangkad ken experience na. Nupay kasta, kinuna ti Cordilleran boxer nga al-alaenna daytoy kas motibasyon tapno saysayaatenna pay ti panagtraining ken panagsagana.
Nagkiddaw met daytoy iti suporta para iti umadani a laban na nangnagruna dagiti kailyanna idiay Ifugao.
Ti 28-anyos a Cordilleran fighter a ni Martin ket tubo ti Ifugao, maysa kadagiti Filipino southpaw nga addaan iti 28 wins and 0 losses. //kcs//
