Iggem dagiti mannalon dagiti nagpipintas a lokal a produkto iti rehion Cordillera a kas iti broccoli ken carrots.
Iti baet daytoy, naduktalan iti Bombo Radyo Newsteam a nakadanon iti probinsia ti Benguet dagiti smuggled broccoli ken carrots a maatap a nagtaud iti pagilian a China.
Sigun kenni Filomena Gayagay, Presidente iti Bagsakan Association iti La Trinidad Trading Post, karit kadagiti lokal a negosyante ti panagadu dagiti imported a broccoli ken carrots iti merkado.
Kinunana pay a naapektaran ti panagangkat kadagiti lokal a nateng gapu iti adu nga imported a produkto kas iti broccoli ken carrots.
Naduktalan pay a sumagmamano a lugar iti Metro Manila ti saan nga agang-angkat iti probinsia ti Benguet gapu iti kinaadu iti suplay.
Kidkiddawenna ni Gayagay nga awan koma ti agangkat nangruna iti bulan ti Disiembre, a mabigbigbig a peak season iti trading post, tapno maipaayan ti gundaway dagiti mannalon a makabangon manen manipod iti pannakalugi iti epekto iti Habagat ken isyu iti importasyon.
Kabayatanna, kiniddawna pay manipud iti nasyonal nga ahensya a kas iti BPI, DA, BOC, PNP ken dadduma pay a maseknan a suportaran ti panagregget iti nagduduma nga LGUs tapno malapdan ti panagserrek dagiti imported a nateng iti siudad ti Baguio ken probinsia ti Benguet. | via Bombo Khey Reparip
