Manamnama a makumpleto ti pannakarenovate dagiti stalls ti bike rental idiay Burnham Park iti siudad ti Baguio sakbay nga agleppas ti bulan ti Oktobre.
Iti sidung ti nasao a proyekto, mabaliwan dagiti stalls iti agpapada a disenyo ti cabin para iti tunggal bike concessionaire tapno nasaysayaat ti serbisyo a maipaay kadagiti bisita.
Maipalagip a nangrugi ti proyekto idi Mayo kalpasan iti inspeksyon ni Baguio City Mayor Benjamin Magalong kenni City Environment and Parks Management Office Head Rhenan Diwas no sadino napaliiwda ti saan a nasayaat a kondisyon iti lugar pakairamanan dagiti kaldero nga araramatenda a pagpapudotan ti danum ken taraon a silulukat a naiparang kadagiti stalls.
Sigun kenni CEPMO Engineer II Jaquilin Tino, dagiti bike concessionaite met laeng ti nangpondo ti pannakarenovate dagiti nasao nga stalls.
Mapatta-patta a dumano iti P200,000 agingga P250,000 ti nagastos iti tunggal stall.
Sakupen ti nasao a gatad ti gastos iti labor ken materyales ti kontstruksyon.
Innayon ni Tino a ti nasao a plano ket napagkaykaysaan iti meeting ti CEPMO ken dagiti bike concessionaires iti Mayo no sadino naiparan ken napagtatalantanan ti maipapan iti disenyo dagiti baro nga stalls.
Aktibo met a nakipaset dagiti concessionaire iti panangpasingked iti disenyo no sadino naikanda metlaeng iti gundaway a mangpapintas kadagiti immunan a plano sakbay a naipinal ti maiyaplikar a disenyo.
Maysa metlaeng kadagiti kangrunaan a napagsasaritaan ket ti panangited iti patas nga espasio iti tunggal stall ken panangipaay iti naisangsangayan a lugar a mabalin a pag-urayan dagiti konstumer.
Inlawlawag ni Tino a ti kagudua a paset ti tunggal booth ket nakaserra a pagserkan ti cashier ken pangikabilan kadagiti personal a kagawaan dagiti concessionaire bayat a ti kagudua a paset ket mailukat a pag-urayan dagiti kostumer.
Impeksa met dagiti bike concessionaire nga awan ti planoda a mangipangato iti presyo ti renta kadagiti biseklata gapu iti nasao a proyekto iti baet nga addu ti gastos iti nasao a renovation.
Inlawlawag pay ni Tino a saan a saklawen ti proyekto ti panangsukat kadagiti bisikleta ken adda kadagiti concessionaires ti desision no kayatda a mangsukat wenno mangpa-upgrade kadagiti ar-aramaten a bisikleta.
Impatalgedna met a a malpas ti pannakapasayaat dagiti bike rental stalls iti Burnham Park iti ngudo ti agdama a bulan tapno maipaay ti nasaysayaat, nasinunuo ken agpapada nga stalls dagiti bike concessionaires. //via Bombo Khey Reparip
