Impeksa ni Richard Buenaventura, COMELEC Officer ti Bakun, Benguet a nagduduma ti nagbalin a reaksyon dagiri umili sadiay maipapan iti pannakailaylayon ti termino dagiti agdama nga opisyales no sadino adda dagiti naragsakan bayat nga adda met dagiti naupay.
Iti pannakiuman ti Bombo Radyo kenkuana, nakasagana metten dagiti kagawaanda para iti nasao nga eleksyon. Kumpleto payen dagiti Electoral boards kasta metten a nakasagana metten dagiti forms para iti Certificate of Candidacy (COC), presinto, voting centers, ken dadduma pay.
Ngem gapu iti Republic 12326 a mangidekdeklara iti pannakailaylayon ti termino dagiti agdama nga opisya, indulinda pay laeng dagiti kagawaan iti eleksyon.
Innayon pay ni Buenaventura nga ita nga Oktobre, kagidan iti Barangay Assembly, guyguyugoyenda dagiti umili idiay a saanda a maup-upay iti pannakailaylayon ti termino dagiti incumbent officers.
Impeksana metlaeng a nakasagana ti amin a munisipyo para iti desisyon ti Korte Suprema iti petisyon a naisumitir seknan iti nasao nga isyu gapu ta naisasagana metten amin a kagawaan. Iti kanito a paboran ti korte ti desisyon, dagosda metten a ma-activate.
Imbinglay ni Richard Buenaventura, COMELEC Officer idiay Bakun, Benguet a kritikal ti maudi a dua a lawas ti agdama a bulan para iti desisyon ti Korte Suprema iti petisyon a panangtubngar iti pannakailaylayon ti termino dagiti agdama a BSKE Officials.
Sigun kenkuana, iti kanito a palubosan ti Korte a maituloy ti Barangay and Sangguniang Kabataan Elections (BSKE), maitantan ti panggep ti ahensya a panangituloy iti registration.
Nupay kasta, nu agtalinaed ti desisyon a mailaylayon ti termino dagiti opisyal, agtuloy ti plano ti COMELEC a registration para kadagiti umili.
Ginuyugoyna met dagiti umili a saanda a maupupay gapu kadagiti pasamak seknan iti elesyon ken kinidawna ti tulong iti tunggal maysa tapno manayunan pay dagiti rehistrado a botante sadiay. //kcs//
