Inyunay-unay ni Baguio City Mayor Benjamin Magalong a saan a maipaayan iti maikadua a gundaway dagiti negosiante nga agilaklako kadagiti nadadael ken saan a natalged a produkto iti Baguio Public Market.
Daytoy ket kalpasan ti panangipaganetget ti lokal a gobierno iti panangipatungpal kadagiti pagannuroutan tapno masigurado ti kinatalged dagiti produkto a mailaklako iti publiko.
Sigun kenni Magalong, agtultuloy ti siudad iti panagsukimat ken panagmonitor kadagiti karne, lames ken dadduma pay a produkto iti merkado tapno maliklikan ti panaglako kadagiti saanen a nasayaat nga inkonsumo ti publiko.
Kinuna ti opisial a dagiti negosiante a maduktalan nga aglaklako kadagiti double-dead a karne, nadadael a lames ken saan a natalged a produkto ket maipaserra ti negosyo dagitoy.
Impaganetgetna a kas kadagiti nabayagen nga agnegosio iti merkado, responsibilidad dagiti aglaklako nga ammoen no nasayaat pay wenno nadadaelen dagiti produkto nga ilaklako dagitoy.
Innayonna a saan laeng a panaglabsing kadagiti pagannurotan ti gobierno ti panagilako kadagiti nadadael a produkto no di ket maysa a peggad iti salun-at dagiti konsumer, nangruna iti posibilidad ti food poisoning.
Maipalagip a nangisayangkat ti Meat and Fishery Products Monitoring Task Force iti inspeksiyon ken panagmonitor kadagiti supermarket iti Central Business District ken Magsaysay Avenue iti Baguio City.
Nakipaset iti inspeksiyon ti pannakabagi ti City Veterinary and Agriculture Office, Department of Trade and Industry, Permits and Licensing Division, Public Order and Safety Division, Health Services Office, National Meat Inspection Service, Food and Drugs Administration ken Bureau of Fisheries and Aquatic Resources.
Inspeksionanda dagiti karne ken seafood a mailaklako, dagiti cold storage facilities ken dagiti lugar a pakaiprosesoan dagiti produkto tapno masigurado a nasayaat ti pannakaidulin ken pannakaimanehar kadagitoy.
Sinukimatda metlaeng ti panagtungpal dagiti establisimyento kadagiti kasapulan a business permit ken dagiti pagannurotan maipapan iti kinadalus ken kinatalged dagiti produkto.
Kas resulta ti inspeksiyon, nangipaulog ti City Veterinary and Agriculture Office iti notice of violation iti maysa a supermarket gapu iti panagaramat daytoy iti deceptive lights a mabalin a mangallilaw kadagiti konsumer iti pudno a langa dagiti karne.
Nakumpisakar metlaeng ti agarup 81.55 kilos a lames gapu iti pannakailasin a spoilage wenno saanen a natalged a kanen.
Gapu iti daytoy, pinalagipan dagiti otoridad dagiti aglaklako a masapul nga ipatungpalda ti nasayaat a sanitation, umno a temperatura iti panagidulin ken nasayaat a panangimanehar kadagiti karne ken lames.
Pinalagipan metlaeng dagiti otoridad dagiti konsumer nga ammoen ken kitaenda a nasayaat ti kalidad, langa ken kasasaad dagiti produkto sakbay a gatangen tapno maliklikan ti pannangan kadagiti nadadael a taraon.//Bombo Khey Reparip
