Nagreklamo iti malicious mischief ken physical injuries ti maysa a lalaki, 29-anyos, taxi driver ken residente iti Pacdal, Baguio City, kontra iti sigud a nobiana a babai, 21-anyos a barista ken residente iti Jasmin Street, Upper Quirino-Magsaysay, Baguio City.
Maibasar iti inisyal nga imbestigasyon, nangibaba ti lalaki iti pasahero iti nasao a lugar.
Simmardeng iti sangwanan ti pagtaengan ti babai tapno damagenna no asino ti makinkukua iti maysa a nakaparada a motorsiklo.
Ngem gapu ta awan ti simmungbat, nagsubli ti lalaki iti taxi na ken nag U-turn.
Idi limmabas manen iti sangwanan ti pagtaengan ti babai, binugkawanna ti lalaki.
Sinungbatan met daytoy ti lalaki iti saan a nasayaat a pagsasao a nangitunda iti tension.
Gapu iti daytoy, maatap a nagibarsak ti babai iti botilia ti arak a timmama iti passenger side window ti taxi a nangitunda iti pannakaperdi daytoy.
Bimmaba ti lalaki iti luganna tapno komprontaren ti babai, ken ginuyodna iti asideg ti taxi.
Ngem imbes nga agsardeng, inpungotna ti buok ti lalaki ken kinugtaranna ti ngato a paset ti saka na a nangitunda iti pannakatumba ti lalaki.
Iti agdama, isagsaganan dagiti otoridad dagiti kasapulan a dokumento para iti pannakaipila ti kaso.//Bombo Khey Reparip
