Ad-adalen iti munisipy iti La Trinidad, Benguet ti pannakipasdek iti maysa a BIPOD Antenna Tower sadiay New Municipal Building, Km5, Brgy Pico, La Trinidad, Benguet.
Iti eksklusibo a pannakiuman iti Bombo Radyo kenni Vice Mayor Guiller Galwan, ti cell site tower ket isingsingasing ti Edgepoint Towers Inc.
Ti nasao a proponent ket maysa nga otorisado a kompania ti DICT nga agop-operate kas Independent Tower Company (ITC) nu sadinno maysa kadagiti trabaho dagitoy ket mangpapintas iti cellular/ communication services iti maysa a lugar.
Iti report iti kompania, maimuntar ti 9 meter a BIPOD Antenna Tower iti rooftop ti baro a building ti munisipyo sadiay Km5, Brgy Pico nga asideg iti Public Market nu sadinno maisingasing metlaeng ti agarup P30,000 nga abang tunggal bulan.
Sigun iti Edgepoint Towers Inc., addan ti naipatungpal a site inspection ken survey nu sadinno rumrummuar a ti lugar a mangpangpanggep a pakaimuntaran ti tower ket “most suitable and feasible location” kasta met a natalged ken efficient.
Panggep ti maibangon a cell site tower a mapapintas ti network connectivity iti lugar.
Kabayatanna, sigun kenni Vice Mayor Galwan, dakkel a tulong ti nasao a singasing para iti pannakapasayaat ti komunikasyon nangruna nu maipapan iti komunikasyon nu adda iti didigra, edukasyon no sadinno adda dagiti sumagmamano a barangay a nakapsut ti signal.
Nupay kasta, impaganetgetna a daytoy ket maipasidong pay iti umno a panagadal nangruna ti health hazard ken dadduma pay a risk sakbay nga agdesision ti Sangguniang Bayan iti munisipyo ti La Trinidad.
Malaksid iti dayta, maaddaan pay ti konsultasion kadagiti umili.
Innayon met ti opisial nga addan ti sumagmamano nga indibidual ti mangkonkontra ti nasao a singasing gapu iti health hazard concerns.| via Bombo Noveh Organo
