Kinumpirmar ti National Privacy Commission (NPC) nakaawat daytoy iti personal breach notifications manipud iti sangapulo nga ahensya iti gobyerno.
Karaman kadagiti ahensya a nakapasar iti data breach ket ti Department of Information and Communications Technology (DICT), Department of Labor and Employment (DOLE) Bureau of Internal Revenue (BIR), ken Philippine Amusement and Gaming Corporation (PAGCOR).
Naaddaan metlaeng iti data breach ti Department of Justice (DOJ), Securities and Exchange Commission (SEC), Department of Trade and Industry (DTI), Department of Science and Technology – Philippine Institute of Volcanology and Seismology (DOST-PHIVOLCS), Presidential Commission on Good Government (PCGG), pakairamanan iti Philippine Coast Guard (PCG).
Sigun kenni NPC Deputy Privacy Commissioner ken Spokesperson Atty. Jose S. Belarmino II, rinugianda metten ti imbestigasyon kadagiti ahensya.
Kagidan dayta, nagpallagip ti nasao nga ahensya iti publiko nga agtalinaed a naridam kontra kadagiti phising attempt, scam, identity theft, ken dadduma pay a social engineering a posible a mangitunda iti pananggundaway.
Nagballakad metlaeng daytoy kontra iti panangreply kadagiti mapagduaduaan a mensahe, basta lattan panangiclick kadagiti saan a pamiliar a website, panangidownload kadagiti saan a mabigbig a files, ken panangipaay kadagiti personal ken sensitibo nga impormasyon.
Nagkari met ti nasao nga ahensya nga ituloyda a bantayan dagiti amin a report ti data breach kadagiti ahensya iti gobyerno.
