--Ads--

Impaganetget ni Baguio City Mayor Benjamin Magalong ti kinapateg ti panangisayangkat iti komprehensibo, nalawag ken transparent a kampanya tapno maipaay ti umno ken naan-anay nga impormasyon maipanggep iti Pax Silica Project.


Sigun iti alkalde, masapul a mailawlawag iti publiko ti pudno a saklaw, panggep ken posible nga epekto ti nasao a proyekto iti pagilian, nangruna kadagiti komunidad a mabalin a direkta a maapektaran daytoy.


Inlawlawagna a gapu iti panagdakkel ti panagwaras ti misinformation ken disinformation maipanggep iti proyekto, napateg a masigurado a dagiti tattao ket makaawat iti nasayaat, umno ken mapagtalkan nga impormasyon tapno maaddaanda iti nasayaat a pannakaawat a naibasar iti kinapudno.


Innayonna pay a masapul a denggen ken ikonsiderar dagiti pakaseknan dagiti nagduduma a sektor, nangruna dagiti umili a mairaman kasta metten dagiti ancestral domain, ken dagiti posible nga epekto ti proyekto iti aglawlaw, kas kadagiti pagtaudan ken suplay ti danum.


Ti Pax Silica ket maysa nga strategic initiative a idadauloan iti Estados Unidos a mangpabileg iti seguridad ti supply chain para kadagiti kritikal a mineral, semiconductor, artificial intelligence (AI), advanced manufacturing ken dadduma pay a teknolohiya.


Maysa kadagiti plano iti nasao a proyekto ti pannakapasayaat ti industrial ken technology hub iti New Clark City, Tarlac, a saklawen ti Luzon Economic Corridor.


Nupay kasta, saan a nasayaat ti panangawat ti nasao nga inisyatibo iti dadduma a sektor gapu kadagiti pakaseknan maipanggep iti pannakapukaw ti pagtaengan dagiti umili, pannakadadael ti aglawlaw, pannakaaramat dagiti natural resources ken posible panaglabsing kadagiti karbengan dagiti katutubo.


Gapu iti daytoy, nangisayangkat dagiti nagduduma a grupo iti protesta iti siudad ti Baguio , kadagiti probinsya iti Cordillera ken iti dadduma a paset ti pagilian tapno ipakitada ti panangbabalawda iti nasao a proyekto.


Namnamaen met ni Mayor Magalong a maaddaan iti nasayaat a dayalogo dagiti gobierno ken dagiti sektor a maapektaran, tapno masungbatan dagiti pakaseknanda ken maipasigurado a ti aniaman a desision maipanggep iti proyekto ket naibasar iti umno nga impormasyon, panagkonsulta ken pannakaipangpangruna iti pagimbagan ti publiko. // via Bombo Khey Reparip