BAGUIO CITY – Nadiskobre ti tropa ti gobyerno ti maysa a naabandona a kampo dagiti rebelde a New People’s Army iti bantay sadiay Bangaan, Sagada, Mountain Province.
Sigun kenni Lt. Col. Narciso Nabulneg Jr., commander ti 54th Infantry Battalion, Philippine Army, nadiskobre dagiti soldado ti nasao a kuta dagiti rebelde a mabalin a mangakomodar ti dumanon 50 nga indibidual wenno dua a platoon dagiti rebelde.
Kinunana a nagresponde dagiti soldado kas maibasar iti impormasyon a naawatda manipud a mismo kadagiti umili seknan iti kuta dagiti rebelde a nailemmeng iti kakaykaywan a paset ti bantay.
Nasarakan pay dagiti soldado ti bagas ken kagawaan a pangkusina dagiti rebelde.
Kinuna ni Nabulneg a mismo a dagiti umili ti Sagada ti mangpappapanaw kadagiti rebelde iti lugar dagitoy.
Maipalagip nga indeklara dagiti umili ken ti lokal a gobyerno ti Sagada a persona non-grata dagiti rebelde nga NPA iti munisipyoda.
Innayon ni Nabulneg a ti panangipaay dagiti umili iti impormasyon kadagiti pulis ken soldado ket pammaneknek a suportado dagitoy ti Regional Task Force on Ending Local Communist Armed Conflict.
Kabayatanna, inyapela met ni PCapt. Basilio Hopdayan Jr., hepe ti Sagada Municipal Police Station ti agtultuloy a panangipaay dagiti umili iti suporta ken impormasyon iti tropa ti gobyerno seknan kadagiti rebelde nga agnanaed iti munisipyoda.
Kinunana a dakkel ti kontribusiyon ti tulong dagitoy iti napartak a panakabigbig dagiti miembro ti rebelde a grupo nga adda iti lugar dagitoy.
Al-allukuyenna pay dagiti nabatbati a rebelde kadagiti kabambantayan iti panagsuko dagitoy tapnu matulonganda babaen iti Enhanced Comprehensive Local Integration Program ti gobyerno.
