BAGUIO CITY – Naibilang a recovered case sakbay pay a nakaawid sadiay Abra ti maysa nga OFW a residente ti Tubo, Abra nga immunan a nagpositibo iti Delta variant bayat ti kaaddana sadiay Manila idi pay July 24, 2021.
Gapu iti daytoy, inyunay-unay ti Provincial Health Office (PHO) ti Abra nga awan pay ti nakastrek sadiay a Delta variant.
Naamuan a nakasangpet iti pagilian ti nasao nga OFW idi pay July 16, 2021 ken dagus a naipasidong iti quarantine sadiay Manila ken idi July 24, 2021 ket rimwar a positibo ti resulta ti RT-PCR test daytoy.
Nagawid ti OFW sadiay Abra idi August 4, 2021 kalpasan a naimbagan wenno nakarekober manipud iti virus.
Apaman a nakasangpet ti OFW sadiay Abra ket dagus metlaeng a naipasidong iti isolation ken iti RT-PCR test idi August 12, 2021 kagiddan ti maikawalo nga aldaw ti isolation daytoy.
Nairuar met ti resulta ti nasao a test idi August 15, 2021 ken negatibo daytoy iti COVID-19.
Impetteng ti PHO ti Abra a nasken a saan a dagus a mamati ken saan nga iwaras iti social media dagiti saan a naberipikar nga impormasyon mainaig iti COVID-19 ken urayen ti opisyal a waragawag dagiti umno nga ahensia.
Kagiddan iti daytoy, iyap-apela latta ti provincial government ti Abra ti panag-annad dagiti umili ken ti panangituloy iti panag-usar iti face mask, face shield ken panagsurot iti social distancing.
