BAGUIO CITY – Agtaltalinaed latta a nababa ti acceptance rate ti covid-19 vaccination iti Benguet iti baet nga addan dagiti narugian a nabakunaan iti nasao a probinsia.
Sigun kenni Governor Melchor Diclas, addu latta kadagiti umili ti agkedked nga agpabakuna kontra iti covid-19 gaputa maamak dagitoy nga intunda dagiti nangnangngeganda a biddut nga impormasyon iti social media ken kadagiti tattao iti aglawlawda.
Kinunana a maibasar iti panagmonitorda iti masterlist dagitoy kadagiti prioridad a mabakunaan ket bassit latta dagiti agpalpalista kadagiti health workers.
Malaksid iti dayta, kinunana nga adu latta kadagiti senior citizens ti agkedked nga agpalista gapu iti butengda a makarikna ti saan a nasayaat nga epekto daytoy.
Dinakamatna a manipud iti nasurok 450,000 nga eligible population ti Benguet a puntiryada a mabakunaan kontra iti COVID-19 ket dumanon laeng iti dua a porsiento ti balligi a nabakunaan.
Nasurok metten iti 500 a health workers ti nabakunaan iti first dose ti sinovac vaccine ken nasurok 200 dagiti nabakunaanen iti 2nd dose ti kapada a brand ti bakuna.
Iti baet daytoy, aw-awisen manen ti provincial government ti Benguet dagiti umili nga agpabakunada iti kanito nga manayunan pay ti bakuna a maawat ti provincial government.
