BAGUIO CITY – Umap-apela manen dagiti barangay officials ti Lower Rock Quarry kadagiti residente ti Baguio City a saanda nga ilemmeng ti basurada kadagiti creek wenno aniaman a pagayusan ti danum.
Iti interview ni Bombo Jez Lapizar kenni Henedina Grande, maysa a barangay employment and services officer, kinunana nga ado manen a basura ti nadalusanda idi kalman iti drainaige ti City Camp lagoon kagiddan ti napasaran a panagtudo iti siyudad ti Baguio.
Dinakamatna a tunggal agtudo iti napigsa ket adda ti basura a maiyanod iti City Camp lagoon ngem saanda met nga ammo ti barangay a nagtaudan dagiti rugit.
Kinunana a nupay saan manen a napasaran ti nakaro a panaglayos iti City Camp Lagoon ket regular ti panangmonitorda kadagiti basura tapno dagus a madalusan dagitoy.
Maipalagip nga idi Marso ket nalayos ti City Camp Lagoon idi napasaran ti napigsa a panagtudo gapu kadagiti nakaad-ado a basura manipud iti nagduduma a barangay a nangpulot iti drainage.
Impeksa ni Grande nga adda dagiti nadutukan nga indibidual nga innaldaw a mangdalus kadagiti basura a maiyanud iti City Camp lagoon tapno maliklikan ti panaglayos.
Kagiddan iti daytoy, kiniddawna manen ti disiplina ken koordinasyon dagiti residente ti siyudad tapno maimanehar a nasayaat dagiti basura.
