BAGUIO CITY- Ado a mannalon iti Benguet ti nadadaelan ti mula a nateng gapu iti agdama a nepnep.
Iti panakiuman ti Bombo Radyo Baguio, inlawlawag ni Agot Balanoy, general manager ti maysa a kooperatiba dagiti mannalon iti Benguet a no diretso ti panagbayakabak ti tudo ket malunglungtot dagiti nateng.
Kinunana a gapu iti agtultuloy a panagtudo iti probinsia ket pagparparikutan ita dagiti mannalon ken vegetable buyers ti ababa a ‘shelf life’ dagiti natnateng.
Sigun kenkuana, ti nalaka a panakalungtot dagiti nateng, nangruna dagiti patatas ket epekto ti acidic unay a tudo malaksid pay a narigat nga ag-mature dagiti repolyo ita a panagtutudo.
Innayonna a marigatan dagiti mannalon iti panag-apitda kadagiti nateng ita a panagtutudo gaputa no mabalin ket likliklikan dagitoy ti agbabad iti tudo.
Iti baet dagitoy, pinagyamanan ni Balanoy ti kaawan parikut iti transportasyon dagiti nateng paturong kadagiti trading centers sadiay La Trinidad.
Dinayawna ti dagus a panag-aksion dagiti personnel ti DPWH, pulisya, maseknan a lokal a gobyerno ken dagiti pribado a kontraktor tapnu mawaknitan dagiti kalkalsada a pakapaspasamakan ti panagreggaay ti daga tapnu makadalan dagiti lugan dagiti mannalon a mangitulod ti nateng sadiay La Trinidad, Bgenguet.
Kiniddawna pay ti panangipadawat laengen dagiti mannalon no adda dagiti nateng dagitoy a saan a malako tapnu maiwaras kas relief goods.
