BAGUIO CITY – Inaklon ti Department of Social Welfare and Development (DSWD) – Cordillera nga agarup uppat a pulo a porsiento kadagiti drug surrenderees idi napalabas a tawen ti saanda pay a naipaayan iti intervention ken livelihood programs.
Sigun kenni DSWD-Cordillera Regional Director Janet Armas, idi 2017 ket agarup sangapulo a ribo ti bilang dagiti drug surrenderees ditoy rehion.
Impalawagna a ti gapu iti kinakurang ti pondo a nailatang para kadagiti drug surrenderees ken iti kinakurang dagiti resources ket adu dagiti drug surrenderees a saanda a naipaayan ti kaskenan a tulong.
Nupay kasta, imapanamnama ni Armas nga aramidenda ti kabaelanda tapno matulungan dagiti drug surrenderees babaen iti community-based rehabilitation programs tapno maisubli dagiti nasao a tattao iti kagimungan, agbalin dagitoy a produktibo a kameng ti ili ken saandan nga agsubli iti dakes a bisyo dagitoy.
Umap-apela met daytoy iti pribado a sektor ken kadagiti non-government organizations iti pannakitinulong dagitoy tapno matulungan ti DSWD-Cordillera iti panakapasayaat pay ti inter-agency drug rehabilitation program ti gobyerno.
