Tallo a banag ti kangrunaan a naipukkaw iti naisayangkat a tignay-protesta iti Baguio City idi kalman — ti Walk-out para sa Edukasyon, Kabuhayan at Pananagutan.
Pinasetan daytoy dagiti agarop lima ribo nga estudyante manipod nagduduma nga unibersidad iti Baguio ken Benguet kas iti University of the Cordilleras, University of the Philippines-Baguio, Saint Louis University,Benguet State University ken University of Baguio.
Iti nakauman iti Bombo Radyo a maysa kadagiti partisipante, karaman iti ipukpukkawda nga adda ti pakainaiganna iti Kabuhayan wenno pagbiagan ti saanda a panangkanunong iti mapangpanggep a redevelopment iti Baguio City Public Maket.
Sigun iti partisipante, makaapektar iti pagbiagan dagiti vendors ti nasao a proyekto rason a saanda a kayat a maituloy daytoy.
Patienda a babaen iti redevelopment ket agbalin nga arigna a maysa a mall ti merkado publiko iti Baguio, banag a posible a saan a masabayan dagiti daduma a vendors nangruna dagiti babassit laeng.
Malaksid iti pakaseknan mainaig iti market redevelopment, karaman pay kadagiti nainget a saanda a kankanunungan ti panagminas ken ti posible a panakaphaseout dagiti tradisyunal a jeep.
Karaman met iti ipukpukkawda mainaig iti Edukasyon ti panakailatang iti kanayonan a pondo nangruna kadagiti State Universities and Colleges(SUCs).
Sigun iti kapada a partisipante,imbes nga ilatang ti pondo para kadagiti proyekto a saan metlaeng naan-anay a maipatpatungpal, nasaysayaat nu maaramat daytoy para iti panakapasayaat dagiti silid pagadalan ken pasilidad nga aramaten dagiti estudyante tapno saandan nga an-anusan dagiti kagawaan nga inladawanna a naaramid sipud pay idi panawen iti kopong-kopong.
Mainaig iti dayta, kinondenar dagiti estudyante ti panakasumon dagiti student leaders a nakikaykaysa kadagiti tignay-protesta nga immunan a naisayangkat gapu iti kaso dagiti panakadadael dagiti pasilidad a tagikua iti gobyerno.
Iti nakauman iti Bombo Radyo a maysa kadagiti partisipante iti nasao nga aktibidad, kwinestyunaranna nu apay nga agingga ita ket awan pay dagiti opisyales a naibalud gapu iti pakainaiganda iti korapsyon.
Iti naisayangkat nga aktibidad, maysa metlaeng ti Pananagutan kadagiti ipukpukkwda nu sadino, kayat dagitoy a mapaksyat dagiti opisyales iti gobyerno a korap.
Nalawag ti panangipeksada iti busdorda kontra iti korapsyon ken kadagiti adda iti likudan daytoy nga aramid.//Bombo Newsteam
