BAGUIO CITY – Dumanon iti 1, 475 nga examinees ti nakapasa iti Philippine Military Academy (PMA) entrance exam manipud iti 15,502 a pakabuklan a bilang dagiti naipasidong iti nasao nga eksaminasyon.
Segun kenni Lt. Col. Reynaldo Balido, panakangiwat ti nasao nga akademya, manipud iti bilang dagiti nakapasa ket 479 kadagitoy ti babbai bayat a 996 met dagiti lallaki.
Maipalagip a ti nasao nga eksaminasyon ket naipatungpal idi Agosto 20 manipud iti nagduduma nga examination centers iti intero a pagilyan.
Kabayatanna, karaman iti Top 10 iti nasao nga eksaminasyon da Grace Silla Cabale; Ian Joseph Agduma Valdez; Jen Kym Danielle Tenedero Danganan; Kimmayong Tabinas Ayahao; Gerizim Morano Villaran; Aeron Jan Omila Sanidad; Mark Nicholas Nava Suemith; Ericka Marie Depositar Torio; Nathan Miguel Gaspar Icaro ken ni Adrian Butalid Cortes.
Inlawlawag ni Balido a kalpasan a nakapasa dagiti nasao nga indibidwal iti eksaminasyon ket maipasidong pay dagitoy iti complete physical examination iti AFP Medical Center sadiay Quezon City.
Kinunana a babaen iti daytoy ket maamuan ti medical, physical ken psychological potentials dagitoy.
Manipud iti pakabuklan a bilang dagiti pimmasa ket 350 laeng kadagitoy ti maala a mangbukel iti PMA Class 2022.
Maiwaragawag met dagiti agbalin a kameng ti Class 2022 inton Abril ti sumaruno a tawen.
