Manamnama a dumanon iti 17,000 nga indibidual ti makaawat iti cash assistance iti sidung ti Unified Package for Livelihood, Industry, Food and Transport (UPLIFT) Program ti Department of Social Welfare and Development (DSWD) no sadino 1,485 ti agtaud iti rehiyon Cordillera.
Nangrugi metten ti payout idi Hulyo 20 idiay Abra, Mountain Province, ken Benguet, pakairamanan ti siudad ti Baguio.
Sigun kenni DSWD-Cordillera Director Enrique Gascon, nagudwa ti tallo a grupo ti pagpokpokusanda ita no sadino tunggal benepisyaryo ket umawat iti P2,000 tunggal bulan iti las-od ti lima a bulan.
Innayonna nga iti mannarimaan a kickoff ti nasao a programa, manual payout process pay laeng ti pamay-an dagitoy.
Nupay kasta, inlawlawagna a kagidan ti manual processing ket ti panangiregisterda kadagiti benepisyaryo tapno agbalinen a digital ti panangiprosesoda iti sumarsaruno a payouts.
Sigun pay kenni Gascon, panggep ti programa a maikan ti basit a pangsupusop dagiti umili kadagiti kasapulanda gapu iti panagngato iti inflation.
Imbinglayna a dagiti tallo a grupo a nakapokusanda ita ket dagiti 4Ps Members, Non 4Ps, ken dagiti indibidual nga addaan iti below minimum wage no sadino ibasarda ti detalye dagiti benepisyaryo iti datos ti SSS.
Impetteng ni Gascon nga ti ipangpangrunada ita ket dagiti Non-4Ps gapu ta kasapulanda pay dagitoy nga agrehistro para iti pannakadigitalized dagiti account da tapno agbalinen metlaengen a digital ti proseso ti payout dagitoy.
Iti agdama, mannarimaan pay laeng ti kickoff ti nasao a programa iti rehiyon. //bombokaren.c.sapirao
