Kinanselar ti Land Transportation Office (LTO) ti pakabuklan a siam a gasut walo pulo ket uppat a driver’s license idi napalabas a tawen gapu iti nagduduma a basol, a kaaduan kadagitoy ket gapu iti panaglabsing iti panagmaneho bayat ti impluensia ti arak.
Sigun kenni LTO chief Assistant Secretary Vigor Mendoza II , karaman kadagiti naikkat a lisensia ket dagiti “errant motorists” wenno saan a nasayaat ti kababalinna a motorista a nagparang kadagiti video a nag-viral iti social media a naipadamag dagiti maseknan nga indibidual iti LTO wenno namonitor a mismo ti ahensia.
Inlawlawag ni Mendoza a ti addang ket paset ti kampaniada tapno madisiplinaan ken para iti responsible a panagmaneho kas paset ti adbokasia ti kinatalged iti kalsada ni DOTr Secretary Jaime J. Bautista.
Maibasar iti datos ti nasao nga ahensia, pito gasut tallo pulo ket innem a driver’s license ti nakanselar gapu iti panaglabsingda ti Republic Act (RA) 10586 wenno ti Anti-Drunk and Drugged Driving Act of 2013, a pakairamanan ti panagmaneho bayat ti impluwensia ti arak wenno iligal a droga, ken panagkedked a maipasidong iti mandatory alcohol test bayat ti vehicular accident.
Kabayatanna, dumanon iti sangagasut tallo pulo a lisensia ti naikkat gapu iti panaglabsing iti RA 4136 wenno iti Land Transportation and Traffic Code, partikular ti pananggun-od iti lisensia iti mapagduaduaan a wagas.
