Nakasaganan dagiti agarup 200 a personnel ti Baguio City Police Office a maideploy iti maangay nga anti-corruption rally iti aglawlaw ti siudad ti Baguio inton umay a dominggo, Setyembre 21,2025.
Iti panakiuman ti Bombo Radyo kenni PMaj. Marcy Grace Marron, pannakangiwat ti Baguio City Police Office, kinunana a maideploy dagitoy tapno agbantay iti aglawlaw, panangimanehar iti trapiko, crowd control ken tapno maipasigurado ti linak ken kappia.
Kinunana a mangrugi ti rally iti Baguio Convention Center iti 8:00 iti agsapa no sadino magnada iti Harrison Road paturong iti Malcolm Square.
Sigun kenkuana, naipaayan dagitoy iti gundaway nga agrally agingga laeng iti 12:00 iti pangaldaw.
Impettengna met a nakaala dagiti raliyista iti permit dagitoy ken nagpirmada iti certificate kas panangtungpal kadagiti amin a requirements iti panagrally.
Impasiguradona metlaeng nga adda dagiti anti-theft team, security, reserve forces ken dagiti quick response team a katulungan dagitoy nga agbantay iti siudad.
Innayonna metlaeng a pakabuklan iti nasurok 600 a pulis ti maideploy iti intero a siudad iti dayta nga aldaw nangruna ket adu dagiti nagduduma nga aktibidad a maipatungpal kas ti Unity Walk ken dadduma pay.
Gapu iti dayta, al-allukuyenna dagiti raliyista nga iyebkas dagitoy dagiti karirikna ken kiddawda babaen iti nasayaat a pamay-an.
