Nangipaay ti Department of Agriculture babaen iti koordinasyon ti Provincial Governent ti Benguet ken Provincial Veterinary Office ti agarup 28 a kalding nga agatad iti Php17,100 tunggal mannalon.
Karaman kadagiti beneficiaries ket manipud idiay Kapangan, Bakun, Bokod, Kabayan, La Trinidad, Sablan, ken Tublay bayat a dagiti mannalon manipud iti dadduma a munisipyo ket maipaayan kadagit sumarsaruno nga alaldaw.
Nagyaman met ni Governor Dr. Melchor Daguines Diclas iti Department of Agriculture -Cordillera nga idadauloan ni Regional Executive Director Atty. Jennilyn M. Dawayan ken Provincial Veterinary Office nga idadauloan ni Provincial Veterinarian Dr. Purita Lesing gapu iti agtultuloy a panangsuportada kadagiti naapektaran a mannalon.
Kabayatanna, naituding met a mangipaay ti Provincial Government ken Department of Agriculture iti libre a manok kadagiti dadduma a mannalon a naapektaran iti bagyo.
Kagidan dayta, nagpalagip ni Dr. Lesing kadagiti amin a mannalon nga ireportda dagiti anyaman a typhoon-related damages kadagiti babbarangayda tapno masigurado ti naurnos nga assessment.
Iti nagsina a distribution activity, inpaay met ti Department of Agriculture ti agarup 21 a baka kadagiti farmer association idiay Baayan, Tublay ken Poblacion, Sablan iti sidung ti regular assistance program. //bombokaren.c.sapirao
